شرمناک کیسے۔۔ ۔زبان پھسلی توبات دور تلک جائے گی

شرمناک کیسے۔۔ ۔زبان پھسلی توبات دور تلک جائے گی
******************************
نمل نامہ (محمدزبیراعوان ) سپریم کورٹ نے عمران خان کو توہین عدالت کا شوکاز نوٹس جاری کرتے ہوئے جمعہ کوجواب طلب کرلیاہے ۔اخباری رپورٹ کے مطابق رجسٹرار کے نوٹ پر عدالت نے قراردیاہے کہ رکن قومی اسمبلی نے عدلیہ کو سکینڈلائز کرنے، ججوں کے خلاف نفرت پھیلانے اور عدلیہ کا تمسخر اُڑانے کی کوشش کی ۔ رجسٹرار نے نوٹ میں لکھاکہ پی ٹی آئی کے سربراہ نے 26جولائی کو پریس کانفرنس میں عدلیہ اور الیکشن کمیشن کے کردار کو شرمناک قراردیا ۔سپریم کورٹ کی طرف سے توہین عدالت کا نوٹس ملنے کی خبرکیساتھ ہی جیسے میں تو ماضی میں ہی کھوگیا۔ ابھی کل ہی کی بات ہے کہ اِسی سپریم کورٹ میں الطاف حسین کے عوامی جلسے میں کراچی کو پاکستان سے الگ کرنے جیسے بیانات پرعدالت عظمیٰ میں درخواست دائر کی گئی جسے چیف جسٹس افتخار محمد چوہدری نے مسترد کرتے ہوئے کہاکہ وہ جلسے اور تقریروں پر کیس نہیں چلاسکتے ۔ مجھے یقین ہے کہ عمران خان نے پریس کانفرنس میں تقریر ہی کی ہوگی یاپھر کسی سوال کا ہی جواب ہوسکتاہے ۔ ۔
ٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓ
۔ عمران خان نے بھی تقریر ہی کی ہوگی جس پر نوٹس لیاگیا۔ اگر دوہرے معیار ختم نہ ہوئے تو اکیلا عمران خان نہیں بلکہ مسلم لیگ ن کے علاوہ دیگر بہت سارے لوگ بھی دانتوں کے نیچے زبان دبائے بیٹھے ہیں۔الطاف حسین کو چھوڑیں ،فیصل رضاعابدی کو ہی دیکھ لیں جواِسی عدلیہ کے بعض ججوں کیخلاف کاغذات کی بوریوں کی بوریاں ہی اُٹھالاتا اور میڈیا پر چیف جسٹس سے اپیل کرتاکہ اُسے توہین عدالت کانوٹس دیں یا پھرویسے ہی بلالیں لیکن کسی نے آج تک اُس کی بات سنی تک نہیں۔۔۔ سابقہ دورحکومت میں اِسی سپریم کورٹ اور اِنہی ججوں نے منتخب وزیراعظم کو بھی گھر بھیجا ہے اور دنوں میں فیصلے ہوتے رہے جس کا شکوہ کئی دفعہ چیف جسٹس کے دوست خاص اعتزازاحسن بھی کرچکے ہیں اور ایک پاورپراجیکٹ میں کرپشن سے متعلق اعتزازاحسن تحقیقات کا مطالبہ بھی کرچکے ہیں لیکن کوئی نوٹس نہیں ہوسکا۔ ۔ ۔اعتزازاحسن نے ہی کہاکہ صدارتی انتخابات سے متعلق فیصلے پر اُنہیں بھی چیف جسٹس پر اعتمادنہیں۔۔۔ مان لیا کہ عمران خان نے وزیراعظم کی نشست حاصل کرنے میں ناکامی پر اپنی توپوں کا رخ سپریم کورٹ کی طر ف کیا لیکن عدالت عظمیٰ کے ہی صدارتی انتخابات سے متعلق فیصلے پر الیکشن کمشنر گھر جاچکے ہیں اور لاہور ہائیکورٹ بار نے چیف جسٹس اور دو دیگر ججوں پر مس کنڈکٹ کا الزام لگایااوراِسی الزام پر سپریم کورٹ جوڈیشل کونسل میں جانے کی قرارداد بھاری اکثریت سے منظورکی ۔عمران خان کو تو نوٹس مل گیا اوروہ معافی کی بجائے قانونی دفاع کرنے کا ارادہ رکھتے ہیں اور بذات خود صرف اپنے وکیل کے ہمراہ جمعہ کو عدالت میں پیشی کا ارادہ رکھتے ہیں لیکن لاہورہائیکورٹ بار کا کیابنے گا؟
ٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓٓ
اِسی بار نے عدلیہ کی بحالی کیلئے تگ ودو کی ،لاٹھیاں کھائیں اور جیلیں کاٹیں اور پوری قوم اس بات کی گواہ ہے۔ کیا وہ بھی اپنی قربانیوں پر پانی پھیرناچاہتے ہیں ؟ایسا قطی طورپر نہیں ۔ اگر عمران خان نے سپریم کورٹ میں جاکرعام انتخابات سے متعلق اپنے تمام تحفظا ت کھلی عدالت میں کورٹ نمبر ایک میں بیان کرناشروع کردیئے تواُس وقت جج صاحبان کیاجواب دیں گے ؟تحریک انصاف سمیت دیگر جماعتوں کے دھرنوں اور ملک بھرمیں بے چینی کے باوجود ازخودنوٹس نہ لینے پر کس طرح جج صاحبان عمران خان کو مطمئن کریں گے ؟ کیا سپریم کورٹ بھی کسی دباﺅ میں آکر فیصلے کرتی ہے ؟ شیخ رشید التحریر سکوائر بنانے کی باتیں کررہے ہیں ۔اینکر حضرات کہہ رہے ہیں کہ عمران خان کو کہناچاہیے کہ اُن کے ساتھ زیادتی ہوئی،سپریم کورٹ بھی بات نہیں سن رہی ، الیکشن کمیشن بھی نہیں سن رہا اور جو کچھ کہا میں اس کی کوئی توجیہات پیش کرنے نہیں آیا، میرے ساتھ الیکشن میں دھاندلی ہوئی ہے اور یہ پاکستان کے سب سے بڑے فراڈ الیکشن تھے جس کے نتیجے میں ایک جعلی مینڈیٹ دیا گیا اور کہیں کہ ہاں میں اپنی بات پر قائم ہوں اور پھر اس کیس کو لڑیں۔عمران خان کی عدلیہ کی بحالی کیلئے بھی کوششیں کیں اور پیپلزپارٹی کے دورحکومت میں عدالتی احکامات پر عمل درآمدنہ ہونے پر بھی سخت موقف اختیار کیا۔سوشل میڈیا پر بھی انسان ہی بیٹھے ہیں ، پاکستان میں سوشل میڈیا پر مہم چلانے کی خالق جماعت کے سربراہ کو توہین عدالت کاشوکاز نوٹس ملے تووہ کیسے خاموش رہ سکتے ہیں ۔ کچھ لوگ تو عمران خان کو اپنے بیان پر ڈٹے رہنے کے ساتھ ساتھ چیف جسٹس سے استعفے کا مطالبہ کرنے کا بھی مشورہ دے رہے ہیں جبکہ پیپلزپارٹی تو چیف جسٹس کا نام لیے بغیر مطالبہ کرہی چکی ہے ۔۔عدالتی نوٹس کی وجہ سے بجلی اور تیل کی قیمتوں میں اضافہ چھپ گیا ہے اور یقیناً اس نوٹس کا مقصد حاصل کیا جا چکا ہے !!!!میں کچھ دوستوں سے اتفاق کرتاہوں کہ سپریم کورٹ کوئی نیا محاذ کھولنے سے گریز کرے گی اور کوئی ایسی قانونی شق نکل آئے گی کہ اگر عمران خان معافی نہ بھی مانگیں تو عدالت وارننگ کیساتھ کیس خارج کردے اوراپنانوٹس واپس لے لے لیکن ۔۔۔لیکن اگر عمران خان اس موقعے پر کوئی مہم جوئی کرنا چاہے تو کربھی سکتا ہے۔۔شائد کوئی راستہ مل جائے۔۔۔
*************************